مرحلة ما بعد الفوز فى اللوترى الامريكى - القرعه العشوائيه الامريكيه

منقول لكم 

قصة الاخ احمد فهمي ورحلته بالفوز بقرعة 2013 وحصوله على الفيزا

تفاصيل حصولى على الفيزا لوترى2013 وحصريا لصفحه قرعه الهجره العشوائيه للاستاذ الفاضل اياد وهدان

بسم الله الرحمن الرحيم والصلاه والسلام على سيدنا محمد عليه افضل الصلوات والتسليم ..وكل عام وانتم طيبين بمناسبه حلول عيد الاضحى المبارك وبفضل الله تعال تزامن دخول العيد مع مناسبه اخرى سعيده بالنسبالى.. وهو حصولى على الفيزا اخيييييرا والحمد لله وذلك بعد 6 سنين من انتظار هذا الحلم ان يتحقق وطبعا بما ان العيد خلاص بكره هعتبر موضوعى دا بمثابه العيديه لكل الاعضاء المهتمين باللوترى واتمنى من الله عز وجل انه يقدرنى وانى احاول انى منساش اى حاجه واوصل المعلومه بشكل جيد مع العلم بانى عمرى ماكتبت اى موضوع قبل كده او اى قصه ومشاركاتى محدوده جدا لانى مليش اوى فى موضوع الفيسبوك اوى زى اصحابى اللى اعرفهم وهو بالنسبالى مش اكتر من وسيله اخباريه  بس ربنا يقدرنى واكتب كل قصتى كامله من غير مافوت فيها اى حاجه سواء كانت كبيره او صغيره وسوف اقوم بعرض الموضوع كاملا غدا بأذن الله تعال عند انهائه كاملا واستعنا عالشقا بالله وانتظرونى غدا J

 ..سوف اقوم اليوم بتوضيح جميع خطوات حصولى على فيزا الولايات المتحده الامريكيه والخاصه بلوترى 2013 وذلك باعتبارى من اوائل الناس الحاصلين عليها ودا بالنسبه لمقابلات الشهر دا شهر اكتوبر ..اللى هو اول شهر بتم فى مقابلات السنه الخاصه بلوترى 2013 واللى كان التقديم فيه اكتوبر2011 يعنى السنه اللى فاتت زى دلوقتى كده.

.. وسوف اعمل على شرح جميع هذه المقابلات وبشكل تفصيلى حتى يستفيد منها اكبر كم ممكن من اعضاء هذه الصفحه الكريمه والتى ادين اليها بالكثير وبالكثير وهذا يعتبر اول جزء من رد الجميل لهذه الصفحه المحترمه.. حيث انها كانت بالنسبه لى الدليل والمرجع الوحيد الذى اثق به وذلك  بدايه من ظهور النتيجه فى اول مايو2012 السنه دى وحتى حصولى على الفيزا بفضل الله تعال قبل اى شىء ثم الاستاذ اياد ثانيا جزاه الله كل خير والذى اعتبره بمثابه اخ اكبر لى ومن اكتر الشخصيات التى اثق بها واكن لها كل احترام وتقدير..

..  نيجى بقى للاهم ....بدايه قصتى كانت عند ظهور النتيجه فى اول مايو وزيي زى اى حد بيقدم بقاله كتير كنت متوقع العباره الشهيره والمحبطه وهى بانه لم يتم اختيارى فى هذه السنه وحظ سعيد فى المره القادمه ودا لانها كانت بالنسبالى السنه السادسه اللى اقدم فيها ولكن هذه السنه تحديدا لما جيت اقدم من الاول خالص فى شهر 10 اللى فات  كنت ساعتها خاطب وهتجوز بعد 4 شهور يعنى قبل النتيجه كده ب3 شهور تقريبا فطبعا سجلت نفسى لوحدى على انى عازب ولما جت بقى ساعه النتيجه كنت فعلا متجوز بقالى 3 شهورولسا بقول يا رب يا كريم ارزقنا من وسعك ... بس متوقعتش ان ربنا هيستجيب لدعوتى بالسرعه دى .

. وكانت هى المفاجاه ...طبعا اى حد جرب الفوز هيعرف الاحساس دا واللى مجربش ان شاء الله مسيره يجرب لو ربنا كاتبله كده... طبعا انا فضلت متنح ومبلم فى الشاشه ومش مصدق اللى انا شايفه بعينيا كأنى بحلم ومش عارف اصحى نفسى  وفضلت عالحال دا لمده ساعه كده مش مصدق نفسى وطبعا فرحه هيستريه مش قادر اوصفهالكم ومراتى كل دا قاعده بتتفرج عليا ومش فاهمه اى حاجه ودا بحكم اصلا انها معندهاش اى فكره عن الموضوع دا.

. طبعا اول مابتديت استوعب المفاجأه قمت صليت ركعتين شكر وزوجتى عماله تسالتى مالك مالك افتكرتنى كسبت فلوس فى مسابقه او رحله سياحيه ههههههه.. طبعا هى مكنش عندها اى فكره لانى زى ماقلتلكم انا كنت مقدم قبل ماتجوز لوحدى وبشكل فردى على انى عازب..  طبعا فضلت طول اللليل افهم فيها وعرفها السحله اللى احنا داخلين عليها والمشوار الطويل دا اللى مستنينا..نيجى بقى للاهم واللى اهم من كل اللى فات دا وهى خطوات ما بعد الفوز.

. طبعا فضلت يومين مش عارف انام من كتر التفاكير ولانى كنت بحاول ساعتها انى اعرف ايه اللى المفروض يحصل بعد كده عن طريق البحث عالانترنت عن موضوع اللوترى وذلك من واقع الخبرات السابقه لناس فازت قبل كده بالهجره وعلموا كل الخطوات دى وحاولت انى اشترك فى اكبرعدد من الصحفات الخاصه بموضوع اللوترى من خلال الفيسبوك وتويتر واعتقد ساعتها ان هما كانو صفحتين بس اللى بيتكلموا فى الموضوع دا وصفحتنا دى مكنتش لسا موجوده مكنش لسا الاستاذ اياد عملها ساعتها   وطبعا قدرت اتواصل مع اصحاب هذه الصفحات واعرفهم ان انا كسبت واسالهم ايه اللى المفروض اعمله بعد كده وذلك على اعتبار طبعا انهم عندهم خبره فى موضوع اللوترى وعارفين كل القصص بتاعته..وفعلا ابتديت اسئلهم واقرأ الشروحات الموضوعه لخطوات ما بعد الفوز واسأل الادمنز عن حالتى الخاصه  ويارتنى ماسالت حد ساعتها حيث كانت الصدمه الكبرى ...

ساعتها قدرت اتواصل مع صاحب احدى هاتين الصفحتين والتى مازالت موجوده حتى الان بنفس الاسم ونفس الادمنز ونفس الاسلوب المتبع وكانت بها اكبر عدد من الاعضاء فى ذلك الوقت بالاضافه انه كان فيه تفاعل كبير بين الاعضاء ..بس طبعا انا مش حابب انى اقول اسم الصفحه او انى اذكر اى اسماء طالما هقدراوصل رسالتى من غير ماعلن عن شخصيته لان ربنا وحده الذى يعلم بنيه كل واحد فينا وربنا يسامحه بقى  ويديله على اد نيته ..وهتعرفوا انا بقول الكلام دا ليه دلوقتى بعد اما تعرفوا حكايتى...  

طبعا انا حكيت معاه الاول وعرفته انى فزت وسالته عن  الخطوات اللى المفروض  اعملها بعد كده علما بانى متجوز دلوقتى والجواب جايلى باسمى لوحدى وانا عايز اضيف مراتى معايا.. واعمل ايه عشان اضيفها وتسافر معايا؟؟ لاقيته بيقولى اغرب وابشع جمله سمعتها فى حياتى واكبر صدمه بالنسبالى وهى ان انا كده هترفض وش فى السفاره مفيش كلام ودا لانى متسجل عندهم انى عازب ودلوقتى انا متجوز وان دا هيعتبر تزوير وهتدخل بلاك ليست كمان وعمرك ما هتعرف تسافر امريكا مدى الحياه وهتصرف فلوس عالفاضى وهضيع وقتك احسنلك تكبر دماغك وتقدم تانى وربنا يعوض عليك وربنا يشهد على كل كلمه بقولها.. 

طبعاهو قالى كده والدنيا اسودت فى عينيا والصدمه كانت هتشلنى.. والكلام دا بعد الفوز بحوالى اسبوع كده وللاسف سالت اكتر من حد فى بعض المنتديات الخاصه بالموضوع دا فيه منهم اللى قالى نفس الكلام دا وفيه اللى قالى انت معندكش اى مشكله ودا طبيعى جدا وانت مكذبتش وطبيعى  ان تحصلك تغييرات فى ظروفك زى الجواز او الطلاق لا قدر الله او الخلفه واكيد القنصل عارف كده.. طبعا انا مبقتش عارف اصدق مين ولا مين ولا اروح فين وفضلت فى الحيره دى لمده يومين عمال ابحث وادور على اى حاله مشابهه ليا او حد يطمنى لانى من جوايا كنت متاكد انى مغلطش فى حاجه وموقفى عادى جدا وطبيعى واكيد الشخص دا هو اللى غلطان  .. 

وفى يوم كده كنت قاعد اقلب فى احد  الصفحتين ولفت نظرى عضو اسمه اياد وهو كان ساعتها مجرد عضو  فى احد هذه الصفح.. واللى لفت نظرى فعلا حجم المعلومات اللى عنده واللى كنت بحسها لما اى حد يسال سؤال فى الصفحه والسؤال يكون متعمق شويه او معقد الاقى الادمنز بيتجاهلوه ومحدش بيعبره  واللى يرد عليه هو الاستاذ اياد   دا طبعا بالاضافه الى  طريقته فى توصيل المعلومه بشكل جيد وردوده الواثقه واسلوبه المبسط فى الكلام وتوضيح الفكره بشكل ممتاز والعديد من الصفات والتى لم اجدها متوفره اصلا عند اصحاب الصفحه نفسها وذلك فى العديد من المواضيع التى تشمل الهجره والدراسه والسياحه والزياره..الخ والمامه بها كلها كأنه دارسها قبل كده  ومن خلال متابعتى لجميع ردوده السابقه توصلت الى سبب معرفته ودرايته بكل هذه الامور حيث اكتشفت انه من الفائزين باللوترى ومقيم بامريكا 

بالفعل بالاضافه الى انه قد تعرض للعديد من التجارب المختلفه من خلال زيارته لعائلته فى امريكا قبل فوزه باللوترى ودا طبعا شجعنى انى احاول اتواصل معاه واساله.. وفعلا بعتله رساله شرحتله فيها حالتى بالظبط وبالكلام اللى الناس قالهولى وبعتله الرساله ونمت ساعتها وصحيت تانى يوم بفتح الفيس لاقيته باعتلى استغراب شديد جدا وبيقولى من اللى قالك الكلام دا.. دا غلطان وستين غلطان وانت ازاى مبعتش ورقك لحد دلوقتى والتاخير دا مش فى مصلحتك علما بانى الكيس نمبر بتاعى 1268  يعنى رقمى صغيروالتاخير فى ارسال الورق ممكن يأخر مقابلتى ..

ونصحنى انى ابعت الاستمارات بعد اضافه زوجنى عادى خالص واتوكل على الله وابعتهم.. طبعا كل دا بثقه شديده جدا تخليك تقول الشخص دا استحاله يكون بيقول اى كلام واكيد فاهم طبعا انا سمعت بكلامه واللى رجعلى الامل من جديد  وفعلا مليت كل الاستمارات وبعتها يوم 11/5 عنى طريق ارامكس واتاكدت من استلام الشحنه بعدها باسبوع تقريبا من خلال شركه الشحن ثم من وازره الخارجيه نفسها بعد اما بعتلهم اميل فى الكيس نمبر بتاعى وبياناتى وردو عليا بعد اسبوع بان الورق وصلهم وانى انتظر لتحديد المقابله وانى اتابع النشره الشهريه اللى بتنزل كل يوم 15 فى الشهر عن طريق نفس الموقع اللى بتقدر تدخل تشيك منه عالنتيجه واللى ظهرلى فى الجواب الاول ..مش هضحك عليكم واقولكم انى كنت خلاص صدقت كلام الاستاذ اياد بنسه 100% ولكن بردو كان فيه بعض القلق جوايا.. 

حاولت اعيش حياتى عادى وعرفت من الاستاذ اياد ان الجواب التانى المفروض انه بيظهر من 15/8 لحد 1/9 ودا لان مقابلتى المفروض تكون فى شهر 10 وفضلت اشيك عالصفحه من اول 8 لحد ما لاقيت فعلا الجواب وصلنى يوم 11/8 والمعاد اتحددلى يوم 18/10 وموجود فيه اسم زوجتى ولينك فيه التعليمات والاوراق اللى المفروض احضرها عشان المقابله وكنت فرحان اوى اليوم دا وقررت ساعتها ان مصدرى الوحيد للمعلومات اما يكون جهه رسميه والمتمثله فى السفاره او وزاره الخارجيه او الاستاذ اياد بنفسه واللى اول ما قلتله انه وصلنى الجواب الاول فرحلى جدا وقالى على الخطوات اللى بعد كده  والاوراق المطلوبه منى  طبعا انا علطول ظبط كل ورقى واللى هو شهاده التخرج من الكليه وشهاده الميلاد وشهاده المعافاه من التجنيد  والفيش الجنائى وصورتين شخصيتين 5*5 وزوجتى نفس الكلام وبدون اى توثيق من الخارجيه ورحت ترجمتهم عند مكتب ناضورى نحاس اللى فى جاردن سيتى ورا السفاره الامريكيه واتكلفوا تقريبا400  جنيه (الورقه ب30) جنيه واستلمته الترجمه بعد اسبوع.. 

طبعا كانت اخر خطوه ناقصانى هى الكشف الطبى وفعلا رحت مستشفى الشروق فى المهندسين عشان اعمله.. طبعا هو كشف روتينى خالص بيعدى منه اى حد معندهوش اى امراض معديه او اى امراض جنسيه وكان ساعتها اللى موجود دكتور اسمه هشام بياخد وزنك وطولك وبيسالك عملت عمليات قبل كده ولا لا انا قولتله انا عامل عمليه فى رجلى تركيب شريحه وانا عندى 5 سنين وسالنى بدخن ولا لا قولتله بدخن و بعدين سال مراتى نفس الاسئله  وقام كاتب حاجات كده وقالى خلاص تمام كده.. بعد كده الممرضه ادتنى حقنتين تطعيم ملاريا وحاجه تانيه كده مش فاكره اسمها بس بالنسبه لزوجتى مخدتش اى تطعيمات عشان هى كانت حامل والحامل مينفعش انها تاخد تطعيمات بعد كده نزلنا نعمل الاشعه بتاعه الصدر والخاصه بمرض الدرن.. 

انا دخلت الاول وعملتها عادى مفيش مشكله لاقتيه بيقولى احنا بالنسبه لزوجتك لازم فى الاول نعملها تحليل دم عشان نتاكد فيه اذا كان فى حمل ولا ولا وذلك لخطوره هذه الاشعه على المرأه الحامل طبعا انا قبل ما يكمل كلامه قولتله من غير تحليل هى حامل فعلا فى الشهر الثانى.. لاقيته بيقولى انا فى الحاله دى مش هينفع اعملها الاشعه دى لان فيها  نسبه خطوره عالجنين ويمكن ان تؤدى الى تشوهات خصوصا لو الاشعه اتعملت فى الشهور الاولى من الحمل الا بقى لو انت مصمم ومضطر انك تعلمها فلازم تجيب تقرير من الدكتور بتاعها بانه مسئول عن كده وان المستشفى ليس عليها اى مسئوليه وانت رزقك بقى..  طبعا كلامه دا لوحده قلقنى جدا واتفاجئت بيه.. 

قولتله خلاص مش لازم الاشعه دى.. احنا نعمل كل حاجه معادا الاشعه وهما اكيد فى السفاره هيفهموا كده.. وكانت دى بقى الصدمه الثانيه ..وهى انى لاقيته بيقولى مش هينفع اصلا انها تاخد نتيجه الكشف الطبى من غير الاشعه دى وكمان مش هينفع اصلا انها تسافر من غير ماتعمل الكشف الطبى كامل ونصيحه من دكتور انت ممكن تاجل الكشف الطبى لحد مابعد الشهر الخامس مثلا  وبعدين تسافر..

انا قولتله بس انا معاد مقابلتى كمان شهر ونض خلاص ولازم يكون معايا الظرف الخاص بالكشف الطبى الخاص بزوجتى.. قالى براحتك بقى يبقى مقدامكش غير انك تاجل سفرك.. طبعا الكلام دا مريحنيش خالص وحسيت كده ان الدنيا وقفت خلاص وكلمت الدكتوره اللى بتابع معاها زوجتى وقالتلى نفس الكلام بردو وان الاشعه دى يمكن ان تؤدى الى اضرار وذلك بنسبه 30%  وخصوصا فى الشهور الاولى وطبعا دى نسبه كبيره جدا من وجه نظرى وانا طبعا معنديش استعداد انى اجازف بطفلى.. طبعا مكلمتش الكشف بتاعها ومشيت واول ما روحت كلمت السفاره لاقيت الموظفه بتقولى انها لازم تعمل الكشف دا قولتلتها مش هينفع قالتلى خلاص براحتك منك للسفير بقى طبعا هى مفدتنيش خالص وحسيتها كده عايزه تخلص ومتسربعه اوى وعايزه تنجز..قلت خلاص اكلم تانى جايز حد غيرها يرد عليا.. لاقيتها هى هى نفس البنت وواضح كده انه مفيش غيرها فى السفاره عشان كده بتنجز نفسها .. وبترد بعد نص ساعه عالانتظار ويمكن اكتر كمان.. 

قلت خلاص مفيش فايده من السفاره انهم يفيدونى ودخلت كالعاده اشوف اى قصه مشابهه ليا واسال بعض الناس وذلك لان الاستاذ اياد مكنش موجود ساعتها نظر لفرق التوقيت بينا وسالت بعض الناس لاقيت اللى بيقولى لازم تعمله واللى يقولى اجل المقابله واللى يقولى مينفعش تاجل عشان كده ممكن تروح عليك واللى يقولى روح من غيره وانت وحظك..  وفضلت  عالحال دا كده طول اليوم وعمال اشد فى شعرى وابعت فى رسايل للاستاذ اياد اللى غالبا كان فى الشغل ساعتها.. 

وكمان كلمت وزاره الخارجيه الامريكيه فى كنتاكى نفسهم قالولى انت خلاص ورقك مش عندنا منك للسفاره الامريكيه اللى هتعمل مقابلتك فيها..  لحد مارجع الاستاذ اياد ورد عليا كالعاده بكل بساطه وبكل ثقه وقالى عادى خالص متعملش الكشف بتاع زوجتك وروح انت وهى المقابله عادى خالص وفهم القنصل انها حامل هيمشيلك الفيزا بتاعتك عادى خالص وهيقولك اول هى ماتعمل الكشف تبعته بالبريد من غير اى مقابله وتتطبعلها الفيزا بتاعتها.. طبعا الكلام دا ريحنى جدا وشال من على قلبى هم كبير اوى واتمنيت ان اليوم دا ييجى بسرعه ويعدى على خير .. وفعلا بعد 10 ايام اتصلت بالمستشفى قالولى نتيجه الكشف بتاعتك خلصت وتقدر تيجى تستلم النتيجه.. 

ورحت فعلا يومها استلمتها واللى هى عباره عن ظرف مقفول واشعه .. واستعديت بقى لليوم الحاسم والمصيرى اللى هو يوم المقابله واللى كان فاصل عليه اسبوعين بالظبط ..وفى اليوم اللى قبل المقابله فضلت مطبق للصبح عشان اقدراروح فايق لانى لو كنت نمت كنت هقوم تعبان  لانى متعود اصلا انام متأخر واللى عرفته سعتها انه بيكون فى طابور قدام السفاره من الفجر والاولويه فى الدخول للناس اللى بتكون واقفه فى الاول وفعلا وصلت هناك حوالى الساعه 6 كده ولابس البدله ومتشيك عالاخر ومعايا زوجتى وملف فيه كل اوراقنا الاصليه بالاضافه للترجمه والكشف الطبى بتاعى ..ولاقيت حوالى 5 بس اللى واقفين فى طابور الهجره وطابور كبير اوى خاص بالناس اللى رايحه زيارات او سياحه لحد ما طلع موظف عالساعه 7 كده مع العلم بان معادى الساعه 7:30  وغالبا كل الناس كدا .. 

المهم لاقيته بدأ الاول يدخل فى طابور الزيارات  و بعدين طابور الهجره وقالنا نحضر جواب المقابله عشان بيطابق الاسامى الموجوده فى الجوابات بقائمه عنده فيها اسامى الناس اللى عندها مقابلات اليوم دا .. ودخلت مع اول 5 فى الاول وعدينا على بوابه التفتيش وطلعت كل الحاجات المعدنيه والحزام وبعدين عديت واخدتهم تانى وقفلنا الموبايلات وسلمناها وخدنا ارقام  بيهم عشان نبقى نستلمهم واحنا خارجين وقالى الولاعه ممنوعه  انها تدخل السفاره فخرجت رميتها ورجعت تانى وبعدين ادانا رقم 606 علما بان الارقام تبدا من 600 دا بالنسبه للهجره اما بالنسبه للزياره بتبدا من 1 عادى ودخلنا كده على استراحه كبيره استنينا انهم ينادوا على رقمنا ..

طبعا كان بمعدل انهم بينادوا على 10 زياره وبعدين واحد هجره كان فيه تقريبا حوالى 18 هجره طبعا بخلاف الزوجات والاولاد وتقريبا حوالى 300 واحد زياره لحد ما نادوا على رقمى كده بعد تقريبا ساعه على شباك رقم 13 دخلت لاقيت موظفه مصريه سمرا كده وشعرها اسود مجعد وقالتلى صباح الخير انت احمد فهمى قولتلها اه قالتلى مؤهلك ايه قولتلها بكالاريوس تجاره قالتلى بشتغل ايه قولتلها بشتغل فى مجال التسويق بشركه امريكيه قالتلى تمام انا عايزه شهاده التخرج وعقد الزواج وشهاده الميلاد بتاعتك انت وزوجتك وشهاده الجيش والفيش الجنائى انت وزوجتك والكشف الطبى بتاعكم ..

اديتها كل الورق دا طبعا معادا الكشف الطبى بتاع زوجتى وقولتلها انا عايز أأجله لمده شهرين عشان هى دلوقتى حامل قالتى خلاص بس ابقى قول للقنصل الكلام دا تانى وبعدين ادتنى وصلين وقالتلى روح ادفع الدى اتش اللى  فى المكتب اللى عاليمين ورسوم المقابله فى شباك رقم 4 ..رحت دفعت الد اتش ال كان 80 جنيه تقريبا واخدت وصل بكده وبعدين رحت على شباك 4 قالى 660 دولار قولتله هدفع بالمصرى قالى مفيش مشاكل 4060 جنيه وادانى وصل بردو.. بعد كده فضلت قاعد مستنى رقمى بس المرادى اتلطعت شويه لحد ماخلصوا مرحله الورق عند كل اللى عندهم مقابلات هجره وكنت خلاص بسقط خالص ومش شايف قدامى مع انى عارف انى هى دى ساعه الجد واهم وقت انى اكون مصحصح بس المرادى طولوا شويه قعدت تقريبا بتاع ساعتين كده وعلى اعصابى ومش شايف قدامى لحد ماجت ساعه الحسم ولاقيتهم بينادوا على رقمى شباك رقم 15 دخلت لاقيت نائب القنصل دا راجل امريكى وفى اواخر الثلاثينات كده وشعره بنى خفيف ودقنه خفيفه وبصراحه كان وشه بشوش اوى غير الموظفين المصريين اللى هناك  طبعا من اول هنا بقى كل اللى جاى بالانجليزى ودا لانى بغبائى كتبت فى الاستمارات انى بتكلم انجليزى وانا الحمد لله مستوايا معقول فى الانجليزى بجكم عملى لمده سنتين مع عملاء امريكان.. 

المهم قالى صباح الخير قولتله صباح الخير قالى هل تقسم ان كل ما هو مكتوب فى هذه الاستمارات حقيقى قولتله اقسم وبعدين قالى ممكن تمضيلى هنا والامضاء دى كانت على الاستمارات اللى انا كنت باعتها بعد الجواب الاول وقال لزوجتى تمضى بردو .. بعد كده سالنى انت بتشغل ايه قولتله نفس الكلام قالى ومين اللى انت  كاتب عنوانه دا ورايحله قولتله دا خال واحد صاحبى وهو مصرى امريكى عايش فى نيويورك وبقاله هناك اكتر من 20 سنه وفاتح محل بازار بس انا كنت حابب انى اغير العنوان دا فسالنى ليه قولتله عشان مش عايز انزل على نيويورك من الاول كده دى عشان اللى عرفته ان مصاريف السكن والمعيشه فيها بيكون مرتفع نسبيا ودا بالنسبه للمهاجرين الجدد لاقيته بيقولى اوكى  براحتك وادانى ورقه كده وقالى اكتب فيها العنوان الجديد واسمه والرقم البريدى واسم الشخص ورقم تليفونه وكتبت فعلا البيانات دى وقراها بصوت عالى تانى للتاكيد عليا  وسالنى انت ايه علاقتك بالشخص دا قولتله صديق قالى وهو بقاله اد ايه فى امريكا قولتله تقريبا سنتين قالى وسافر ازاى امريكا قولتله عن طريق اللوترى قالى بردو بضحكه كده وملحوظه كده عالماشى الشخص دا هو الاستاذ اياد وهدان اللى اول ماعرف انى عندى مشكله فى موضوع العنوان بعتلى كل بياناته بدون اى تفكير ومن غير ماطلب منه كده جزاه الله كل خير..  

المهم لاقيت القنصل بيقولى انت بالنسبالك كده تمام مش فاضل غير بصماتك وخد البصمات فعلا وقالى انت كده خلاص وبعدين لاقيته بيوجه الكلام لزوجتى بيسالها فين الكشف الطبى الخاص بيكى انا قولتله هى مش بتكلم انجليزى كويس قالها بالعربى اين الكشف الطبى.. هى قالتله انها حامل و الدكتوره بتاعتها قالتلها مش هينفع تعمله الا بعد الشهر الخامس عالاقل .. طبعا انا حسيت كده انه تاه منها ومش فاهمها اوى مع انه المفروض انه عارف الكلام دا من الموظفه المصريه اللى خدت ورقى لانى قولتلها نفس الكلام لما سالتنى عن الكشف الطبى بس هو شكله كده حابب يتاكد.. المهم انا قمت عايد نفس كلامها  وشرحتله الموضوع بس بشكل تفصيلى شويه من اول ما رحت مستشفى للشروق والدكتور قالى لازم تقرير لحد ما كلمت الموظفه فى السفاره وقالتلى منك للسفير.. بس لاقيته بعدها بيسالنى يعنى انت كده عايزها تولد هنا ولا فى امريكا قولتله  ياريت فى امريكا لاقيته ضحك كده وقالى خلاص مفيش اى مشكله هى بس لازم تعمل الكشف الطبى فى اى وقت قبل الولاده  وبعدين تبعته بالبريد عالسفاره مع الباسبور وانا هطبعلها الفيزا بتاعتها علطول.. 

انا طبعا اول ما سمعت كلمه هيرجلعنا الباسبور دى قولت فى نفسى اوبااااااا انا كده شكل حالتى هتدخل فى اجراءات اداريه وشغلانه خصوصا انه لحد الوقت دا  مفيش اى حد طلب من الصور الشخصيه ال5*5 وبعدين فضل ساكت كده شويه وبيكتب حاجات عالكمبيوتر لمده دقيقه كده وانا فى قمه التوتر ومستنيه يخلص وبعدين سألته هو ليه الموظفه مخدتش من الصور بتاعتنا قالى عشان احنا مش محتاجينها قولت خلاص كده وش راحت الفيزا ولسا هساله انا بالنسبالى كده ايه الكلام..  لاقيته بيقولى مبروك انا موافق عليك انك تسافر والباسبور هيوصلك فى خلال اسبوعين وبالنسبه لزوجتك مجرد ماتعمل الكشف الطبى بتاعها تبعته مع جواز السفر وادالها فعلا الباسبور لانها هتحتاجه فى الكشف الطبى ولاقيته اخد الباسبور بتاعى وقالى مبروك تانى طبعا انا شكرته بحراره  وانا الود الودى انط من الازاز واخده بالاحضان طبعا مكنتش مصدق نفسى وان اليوم دا عدى وخلص خلاص واكتشفت ان الدنيا كانت ابسط مما الواحد كان متخيل.. دا لو انت ورقك كله تمام ومكذبتش فى اى حاجه  وطبعا لو ليك نصيب انك تسافر...  طبعا يا جماعه من غير ماقول انتوا عارفين مين اول واحد بلغته اول ماروحت البيت بانى عديت خلاص المقابله واتوافق عليا؟؟ ايوا هو فعلا الاستاذ اياد وفلولاه يعلم الله يمكن مكنتش اكمل فى الحواردا من اصله بعد الناس كلها ما عقدتنى وحسيت انى هصرف مصاريف كتير وهعطل نفسى واشغل تفكيرى عالفاضى.. 

بعد كده بقى جيت احسبها  قلت الباسبوربراحه اوى مش هييجى قبل العيد لانه خلاص فاضل اسبوع عالعيد وكلمتهم فعلا فى التليفون قالتلى مش قبل 10 ايام قلت بعد العيد بعد العيد المهم ييجى..  ولكنى فوجئت بعدها ب 6ايام بس بانى صحيت على تليفون الساعه 8 الصبح لاقيت واحد بيقولى انا موظف دى اتش ال وجايلك بريد من السفاره وعايز بس اتاكد من العنوان وجالى فعلا بظرف كده فتحته لاقيت ظرف اصفر مقفول مكتوب عليه ميتفحتش الا فى مطار امريكا والفيزا مطبوعه والحمد لله وسوف تنتهى قبل 20/3 يعنى صالحه لمده 6 شهور من تاريخ الكشف الطبى وكانت هذه نهايه القصه وحصلت على الفيزا والحمد لله.. انا عارف انى طولت عليكم بس بجد مش هيقرا كل القصه دا ويوصل لحد النقطه دى الا اذا كان حد مهتم فعلا بجد وحلمه زى حلمى ونفسه انه يسافر وعايز يفهم بجد.. عشان كده انا حبيت انى استعرض تجربتى بالكامل وبشكل تفصيلى ممل كمان على قد ماقدرت ودا لان ان انا نفسى كنت بدور على اى تجربه حديثه من احد 

الفائزين واللى هى محدوده جدا وبتكون مختصره ولو لاقيت واحده مفصله كده بتكون قديمه مع الاخذ فى الاعتبار التغييرات اللى بتحصل فى برنامج اللوترى وذلك من مصاريف وطرق المراسله والاجراءات المتبعه وخلافه بالاضافه طبعا للاسئله الشخصيه الخاصه بحاله معينه والتى لم تكن متوفره حتى الان  وثانيا ودا الاهم انا حبيت انى اوصل رساله ونصيحه فى نفس الوقت لكل اللى بيقدم فى اللوترى او اللى فاز بالفعل ومنتظر المقابله اول اللى مخلصش ورقه او اللى لسا بيفكر يقدم وهى انهم لما يحبوا يسالوا  اى حد عن اى حاجه تتعلق بالهجره او السفر بشكل عام لاى غرض انه مينفعش  انك تسأل اى حد وخلاص وتسلمله ودنك ودماغك لمجرد انه كاتب موضوع  او عامل صفحه او جروب وبيدعى ان هو فاهم كل حاجه وعمال يفتى عمال على بطال فى كل المواضيع لدرجه تحسسك انه هو لف العالم وخاربها سفريات وهو فى الحقيقه اصلا تلاقيه عمره ماخرج بره محافظته مع احترامى طبعا لبعض الناس منهم لانه فعلا فيهم ناس محترمين جدا وبيحبوا يخدموا وحتى بدون سابق معرفه ودا لاننا احنا كمصريين مش بنتأخرعلى بعض فى اى حاجه وبنحب نساعد بعض على قد مانقدر لو حد مننا مش فاهم اوبيسالنا عن حاجه .. 

بس بردو احنا كمصريين بنحب نفتى فى كل حاجه وفى اى حاجه حتى لو مش فاهمين اوى اومش متاكدين.. ودا بردو انا بشوفه من الناحيه الايجابيه شىء كويس بردو لا شايف ان دا بيندرج تحت حب المساعده للغير والمشاركه ..لاننا ببساطه شديده جدا مش بنحب نقول كلمه معرفش او متعودناش على كده وبنخجل من كده بس صدقونى فى الحاجات المصيريه دى واللى ممكن غلطه صغيره جدا وبدون قصد او معلومه غلط من حبايبنا اللى قاعدين يفتوا انه تتضيع كل حاجه وتبوظ الدنيا وتلاقى نفسك بتاخد الرفض المتين مع انك كنت معتقد ان انت ماشى صح وانك مكنتش فاهم ودا بحسن نيه بس السفير طبعا ملوش غير اللى قدامه ومش هيدخل جوا دماغك ويشوف نيتك اذا كانت سليمه ولا لا ..عشان كدا لازم الواحد يفكرالاول ويحكم عقله  ويكون متاكد تماما ان هو ماشى فى كل حاجه بطريقه صحيحه وذلك باللجوء الى اصحاب الخبرات الحقيقيه او حد يكون متخصص زى المستشاريين او المحاميين المعتمدين ودا لانه مش من المنطق خالص ان مصدرنا للمعلومات يكون واحد عمره فى حياته ماسافر وعمره ما عمل الخطوات دى قبل كده.. ودا طبعا اللى بيقوله العقل والمنطق لانه مفيش اى حد هيقدر يفيدك ويديلك المعلومه صحيحه واكيده بنسبه 100%  الا اذا كان حد خاض  نفس هذه التجربه بالكامل وبكل مراحلها   لانه مينفعش انى اسأل شخص كل المعلومات التى يملكها مقتصره على مجرد  اجتهادات وتخمينات .. 

ودا طبعا مش معناه ان الناس دى ملهاش دور او معندهاش فكره لاسمح الله بس اللى انا عايز اوصله انه فى حاجات بتكون بديهيه وثابته عند كل الناس وليست مصيريه زى الاسم رباعى ولا خماسى ولا العنوان يكتب ازاى والرقم البريدى وامثله كتير كل الحاجات دى عاديه ممكن نتكلم فيها ونقعد نفتى براحتنا ونسال عادى مفيش مشكله ونغلط كمان.. بس لان كل الحاجات دى نقدر اننا  نعدل فيها براحتنا ولو فى غلطه نصلحها  اونحدث اى معلومه وذلك بعد الفوز وظهور الجواب الاول وذلك بالنسبه للوترى.. لان فى حاجه كده انا قدرت انى استنتجها بالنسبه لحالتى وتجربتى انهم حاجه عندهم فى استماره التقديم الاولى اهم حاجه ان صوره المتقدم الرئيسى تكون صحيحه100% مفيهاش اى لعب وان الحاجه الثابته الوحيده اللى بتكون معاك بعد التقديم وحتى بعد الفوز هى الكونفرميشن نمبر.. وتقدر بقى بعد كده تصلح لو فى اى غلطه  فى التواريخ او الاسم او المؤهل لما تيجى تبعت الاستمارات وبيكون بردو عندك فرصه تانيه انك تعدل او تصحح اى حاجه وقت 

المقابله وصدقونى يا جماعه اهم حاجه فى القصه دى كلها ان انت فعلا تكون مؤهل للوترى ومطابق للشروط طبعا لو انت مؤهل يبقى عمرك ماهتكدب بس معرض انك تغلط او تكتب حاجه غلط ولكن فى النهايه هتقدر انك تصحح الغلط وكل حاجه ممكن تتغير والقنصل سوف يتفهم ذلك لانه اهم حاجه عنده انك لازلت تنتطبق عليك شروط البرنامج واللى تقريبا كلنا عارفينها  وطبعا فى التقديم مش مطلوب منك غير انك تتصور صوره صحيحه واضمن انك دخلت فى السحب فعلا ولو ربنا كاتبلك انك تفوز هتفوز حتى لو قدمت فى اخر دقيقه فى فى مرحله التقديم  وبالنسبه للصوره وعن تجربه شخصيه انا اتصورت فى ستوديو كادو فرع شبرا مصر وانا اصلا شبراوى وهما هناك فى الاستديو عارفين اصلا  موضوع اللوترى دا كويس وعندهم فكره عنه من زمان ومتمكنين من ناحيه مواصفات الصوره المطلوبه 

..ونصيحه منى لو دخلت اى استوديو لاقيته مش عارف ايه اللوترى بلاش انك تجازف ومتتصورش عنده واحسنلك تشوف حد تانى بس عالاقل عشان تتضمن انك دخلت فى السحب ومضيعش فرصتك وبعد اما تتطلع الصوره اعرضها على اى حد  بشرط انه يكون فاز قبل كده فى اللوترى وهو اكيد هيفيدك... واخييييرا وليس باخرا احب انى اشكر كل اعضاء هذه الصفحه الكريمه انا عارف انى طولت عليكم اوى وصدعتكم كمان بس بجد انا لو مكنتش عملت كده كنت هابقى حاسس بتقصير شديد واسمحولى انى اخص بالشكر الادمن المحترم والاخ الاكبر الاستاذ اياد وهدان وذلك لما قدمه لى من نصايح وارشادات  والذى مهما فعلت ومهما قلت ماوفيته حقه وماكفيته ولو بجزء من رد الجميل واتمنى له كل التوفيق وان اراه بكل خير وسعاده الى ان القاه فى بلد العم سام قريبا بمشيئه الرحمن.. 

واتمنى لكل الاعضام الكرام والذى لم يحالفهم الحظ فى هذا العام  فى الاختيار ان يكتب الله لهم الفوز بمشيئته فى النتيجه القادمه بعد بضعه شهور وانا على اتم استعداد للرد على استفسارات او اى تساؤلات وذلك فى حدود معرفتى وخبرتى وبقدر ما املك من معلومات وما استطيع انا اقدمه لهم وبكل صدر رحب وبكل حب واتمنالكم لكم الخير جميعا وكل عام ونتم طيبون والسلام عليكم ورحمه الله وبركاته